I va per la via sur il Pass dal Güglia. En differents lieus datti stretgas. Cunzunt là, nua che la via naziunala maina tras ils vitgs. Uschia per exempel a Mulegns, a Cunter avant Savognin, ni era a Beiva. Per tuts trais lieus aveva la regenza grischuna inoltrà projects tar l’Uffizi federal da vias ASTRA. Oz è cler: Mo il sviament da Beiva vegn examinà.
Sviaments Mulegns e Cunter èn stritgads
A Mulegns è la situaziun sa midada radicalmain dapi che la Fundaziun Origen ha laschà spustar per plirs meters la «Villa Alva» il 2020. La via è ussa pli lada, ed ins ha perfin pudì bajegiar in passape.
![La Villa Alva a Mulegns è vegnida spustada per otg meters. La Villa Alva a Mulegns sin ils indriz per spustar ella per 8 meters.](https://www.rtr.ch/static/cms/images/960w/3352993.jpg)
A Cunter n’è la situaziun dentant betg sa meglierada. Sco quai ch'il directur da l'ASTRA Jürg Röthlisberger di, hajan els analisà il project per in sviament ch'els hajan surpiglià dal chantun, e sajan vegnids a la conclusiun che la relaziun tranter custs, gudogn da segirtad e qualitad da viver per ils abitants na saja betg buna. Tenor l'ASTRA dettia bain cleramain ina stretga amez il vitg – problems cun il traffic dettia dentant en emprima lingia mo durant la stagiun turistica.
Malgrà quai na muntia la decisiun da la Confederaziun dentant betg ch'ins serria ils egls avant il problem dals abitants da Cunter. «Sche la stretga vegn schliada, e cun tge meds, è ussa nossa lavur. La vischnanca po dentant sa fidar che nus ans occupain dals problems e che nus elavurain soluziuns.»
Sviament Beiva sin buna via
Meglier vesi ora per ils da Beiva. Era qua prevesa il project ch'il chantun aveva elavurà in sviament. Per Jürg Röthlisberger è cler che la situaziun dal vitg avant il Pass dal Güglia pretenda ussa ina schliaziun. «La stretga è gia dapi decennis in tema, ed il chantun ha era gia lavurà ditg vid ina schliaziun. Nus vulain ussa a moda speditiva procurar per ina schliaziun che ademplescha ils criteris da niz e da custs, e che vegn era purtada dad ina maioritad e da la regiun.»
Anc na sajan ils plans ed ils documents betg sin il nivel necessari. Perquai na possian els era betg anc giuditgar da rudent il project dal chantun. Quai vegnia ussa dentant prendì per mauns cun la spertadad necessaria, empermetta Röthlisberger.