Muntogna da Schons - Fanestras d'advent en set vitgs

Dapi intgins onns è Karin Spring da Casti da l'uniun da dunnas Muntogna da Schons responsabla per organisar las fanestras d'advent ch'han tradiziun. L'emprim vegnia dumandà en l'uniun tgi che haja gust da far ina fanestra. Davent dals 10 da november vegnia alura avert per tuts e tuttas che hajan gust da sa participar. Per il pli saja pli u main ils medems e las medemas che sajan da la partida. Igl haja er gia dà onns, nua ch'ins n'haja betg gì avunda glieud, mo per regla gartegia da chattar 24 persunas che fetschian ina fanestra d'advent.

Ils numers vegnan repartids a moda e maniera pragmatica: Mintgin dastgia dir tge numer ch'el u ella avess gugent. Sche quel saja gia occupà alura saja da prender in'autra. Quai na saja nagin problem, di Karin Spring. L'emprim da december vegnan tut ils cedels pendids en la fanestra che vegn lura decorada ed illuminada la data correspundenta il december. Las fanestras restan decoradas fin ils 6 da schaner, il di dals Trais Sontgs Retgs. Ils 29 da december fan las dunnas da l'uniun e las ulteriuras participantas ina tura a la Muntogna da Schons per guardar tut las fanestras –davent da Vargistagn sisum la Muntogna fin a Donat, la vischnanca il pli giudim da la Muntogna da Schons. Là datti in pitschen aperitiv ed in vin chaud u in punsch.

Impressiuns da l'onn passà

Sch'il va per fanestras d'advent pon ins dir che Giana Eugster da Farden è gia ina veglia vulp. Betg gist mintg'onn, però gia varsaquantas giadas ha ella zambregià e decorà ina fanestra d'advent. Er quest onn è ella puspè da la partida. Ma simplamain prender mintg'onn la medema decoraziun or dal truclet na vegn per ella betg en dumonda. Ella fa per il pli adina insatge auter. Sch'ella ha fatg ina lavur pli gronda poi bain esser ch'ella dovra anc ina giada la decoraziun, mo quella vegn lura tuttina inscenada auter.

Quant temp ch'ella investescha mintgamai na po ella betg dir, ma ella fetschia gugent quai. Sch'ella ha ina idea, vegn quella skizzada sin palpiri e lura discutà cun ses um ch'ha lura medemamain er anc ideas, e lura sa dat il concept per la fanestra d'advent. Er ses um gida da zambregiar. La paja per la lavur che Giana Eugster e ses um fan per lur fanestra d'advent sajan ils resuns ch'els survegnian da la glieud. E cunquai che lur chasa è sper la pista da scarsolar saja er magari glieud estra che sa fermian, guardian e mussian interess, quai fetschia bain plaschair. I saja er simplamain bel che las vischnancas sajan ornadas e decoradas il temp d'advent. Tge ch'ella fa quest onn per sia fanestra dal prim da december n'ha Giana Eugster betg propi vulì tradir.