Dapi 50 onns exista la Caspar Haustechnik SA. La firma cun nov collavuraturas e collavuraturs maina Bruno Dedual. L’um da 35 onns ha surpiglià la Caspar SA avant tschintg onns ed uschia è ina midada ussa forsa ina surpraisa. Per Dedual dentant è quel pass ina decisiun a lunga vista. El vesa ils avantatgs da concurrenza e da structuras pli grondas. Cun vender la fatschenta a la Hälg Group vul Bruno Dedual profitar da questas fermezzas ed il medem temp restar preschent en la regiun.
Team e lieu resta
La Caspar Haustechnik SA vegn integrada per il prim da schaner 2025 en la Hälg & Co. SA, ch'ha 24 filialas en tut la Svizra. La filiala da Tinizong è la tschintgavla en il Grischun. Sco manader da la filiala vegn el a surpigliar vinavant la direcziun operativa e strategica al lieu ed il medem mument a profitar dal sustegn e da las resursas d’ina ferma gruppa. Per il team è l'integraziun en ina firma d'avantatg, per exempel sche insatgi vul sa spezialisar u midar lieu da lavur, dentant betg il patrun. Grazia al barat specific da persunas qualifitgadas e la savida engrondida en il sectur clima e ventilaziun po ussa vegnir ademplì anc meglier ils basegns da la clientella.