Sco quai che Curdin Capaul, il president communal, ha ditg, dettia adina puspè cas da vandalissem sin il territori da Tusaun. Plinavant vegnia adina puspè deponì rument illegalmain sin il territori da vischnanca, quai tranter auter era da glieud dad auters lieus.
Perquai ha la suprastanza proponì midadas en la lescha da polizia. La radunanza communala ha fatg mesemna saira pliras midadas vi da la revisiun proponida. Sur da quella vegn votà ils 26-11-2023.
Decisiuns da la radunanza communala
- La montascha da cameras per «la segirtad da scolars e scolaras» ed ulteriuras persunas è vegnida acceptada.
- In artichel en la lescha che fa pussaivel da scumandar da chavaltgar sin vias e ch'oblighescha persunas cun chavals da nettegiar las vias da ruments dals chavals è puspè vegnì stritgà.
- Occurrenzas en il spazi public dastgan da nov cuzzar fin las 02:00.
- Restricziuns da grillar na datti neginas, in paragraf correspundent è vegnì stritgà cun gronda maioritad, scriva la chanzlia da la vischnanca.
Ulteriuras midadas sco il scumond da chauns sin la plazza da gieus e da fieus artifizials èn er approvads. Plinavant propona la radunanza communala ina charta da parcar da 7 dis per turistas e turists, e da vinavant lubir da parcar gratuitamain a la Neudorfstrasse per 30 minutas.
Quint annual
Plinavant a la radunanza communala approvà unanimamain il quint 2022. Quel serra cun in minus da radund 136'000 francs tar expensas da 28 milliuns.