Daniel Stiefel è manager e cussegliader d'interpresas. El ha 56 onns e deriva dal chantun Turitg. Suenter si’uffanza saja el collia ferm cun la regiun da Lai ed el saja era in fan da la regiun, ha ditg il nov eligì president da la Lai Marketing e Support SA a la radunanza generala. Daniel Stiefel che posseda in’abitaziun da vacanzas a Lai è da l’avis, che Lai haja in’offerta attractiva e quai l’enviern sco era la stad. El sa legria, da pudair nizzegiar las sias experientschas professiunalas e da sviluppar la regiun da turissem da Lai uschè sco quai ch’ils giasts e la populaziun giavischian. Stiefel viva cun sia famiglia a Richterswil. Là cusseglia el tranter auter clients che derivan da la branscha da prestaziuns finanzialas.
Novas testas en il cussegl d'administraziun
Plinavant èn vegnids elegids da nov en il cussegl d’administraziun Felix Frei, Brigitte Küng e Bruno Zenklusen. Plinavant è vegnì infurmà, che Bruno Fläcklin ch’è stà malsaun ha puspè surpiglià la gestiun da l’organisaziun turistica da Domenico Bergamin, ch’ha manà ils affars ad interim.
Quint quasi gulivà
Il quint dal 2020/21 serra quasi gulivà cun in pitschen minus da 229 francs. Il retgav da gestiun munta a 5,3 milliuns francs, tge ch’è in plus da 7,6% en congual cun in onn avant. Las expensas da marketing èn s’augmentadas per 300’000 francs sin stgars 2,3 milliuns francs.