Lai - Guaud magic attira puspè blera glieud

Per la novavla giada ha il guaud magic envidà cun glisch e musica, e quai durant 19 dis. Radund 40'000 visitadras hajan visità il «Zauberwald». Quai ha ditg Giancarlo Pallioppi, il president dal comité d'organisaziun. En il guaud magic hai dà 14 installaziuns da glisch d'artistas ed artists svizzers ed internaziunals. Divers concerts sajan stads vendids ora, tranter quels Stubete Gang, Hecht e Bligg. Malgrà ch'igl haja dà dis cun plievgia e lavur supplementara cun pumpar davent l'aua dals trutgs, quintan ils organisaturs da pudair terminar il quint cun ina nulla naira, quai tar in preventiv da circa 1,6 milliuns francs. Gia ussa saja cler, ch'i vegnia organisada era la dieschavla ediziun da giubileum. Quai sche pussaivel cun in medem aut preventiv sco quest onn, u forsa magari pli aut, ha ditg Pallioppi.

Per l'iniziant dal guaud magic Giancarlo Pallioppi e president dal comité d'organisaziun è il tema persistenza gia stada da l'entschatta ina impurtanta. Ussa ch'il tema mancanza d'energia saja omnipreschent saja stà cler dad er contribuir insatge:

• Il guaud magic è stà avert mo 19 enstagl da 20 dis,
• las illuminaziuns d'art han traglischà mintgamai in'ura pli pauc e
• durant la notg è vegnida interrutta la forza electrica cumplettamain.

Sensibilisar per la persistenza

Cun sensibilisar tuts per la tematica e – per exempel er cun reducir il consum – quintan ils organisaturs d'avair spargnà 10% forza electrica. Quella vegnia bain producida directamain sper il guaud grazia a l'aual. Tuttina hajan els er ina funcziun d'exempel.

En general po Pallioppi dir ch'il guaud magic ha duvrà relativamain pauca energia. Ils ultims onns eran quai cun bajegiar si, il manaschi ed il bajegiar giu enturn 23'000 uras kilowatt. En cumparegliaziun cun in gieu da hockey u quai ch'ina famiglia dovra, saja quai pauc. La fin finala saja er da resguardar la purschida per egl, olma ed il sa cumblidar durant il temp en il guaud, resumescha Pallioppi. Cun glischs da LED sajan las illuminaziuns artisticas gia adina stadas fitg ecologicas.

Impressiuns dal guaud magic 2022