Venderdi saira, 19:32, il tren en direcziun San Murezzan ha bandunà la staziun da Preda. En il tunnel d'Alvra II rumpa ina axa e la cumposiziun da dus trens Capricorn siglia or da la rodaglia. En il tren èn radund 15 fin 20 passagiers e passagieras. Il tunnel Alvra I n'è anc betg pront sco tunnel da salvament e na po betg vegnir nizzegià.
Quai èn las premissas per l'exercizi da las organisaziuns da salvament. L'eveniment simulà dat a polizia, pumpiers e sanitad la pussaivladad d'emprender d'enconuscher il nov tunnel, ina situaziun speziala era per Conradin Caduff, manader da l'inspecturat dals pumpiers dal Grischun. Per el èsi en general fitg impurtant ch'ins po trenar ils mecanissems, da l'alarm fin il salvament – tant per las persunas en acziun directa sco era per ils manaders.
Tecnica speziala per ils binaris
Pumpiers e sanitad sa mettan sin via en il tunnel cun in vehichel spezial, che po charrar sin via, sco era sin ils binaris – ina moda fitg effizienta da vegnir fin tar il tren cupitgà.
Al lieu sto la situaziun vegnir analisada. Las persunas serradas en il tren vegnan spendradas ina suenter l'autra – tut observà da divers inspecturs da tut las organisaziuns participadas. Per il schef infrastructura da la Retica, Christian Florin, èsi ina impurtanta pussaivladad da per l'ina pudair trenar, per l'autra era d'avair la schanza da meglierar proceduras, sch'insatge na funcziuna betg.
La coordinaziun è impurtanta
Betg mo en il tunnel èn bleras persunas a la lavur. A Preda vegn tegnì la survista e coordinà la lavur cun la polizia. Bain saja la situaziun en in cas vair anc ina giada in'autra, cun dapli adrenalin e squitsch – dentant porschia mintga exercizi la pussaivladad d'emprender ed ins vegnia pli segirs, di Conradin Caduff.
Suenter radund duas uras èn tut las persunas salvadas or dal tunnel ed il exercizi va a fin. Ils responsabels èn cuntents.
Nus savain uss ch'i funcziuna sche nus avain in cas d'urgenza – e sa legrain sin l'avertura
L'avertura stat davant porta
Gia l'emprim tunnel è stà ina prestaziun d'inschigneria extraordinaria – avant 120 onns. La construcziuns dal nov tunnel è durant ils ultims 10 onns stada il pli grond plazzal dal Grischun. Bler è capità durant quest temp, bler è era sa midà. Ils Cuntrasts ans mainan sin in viadi en il passà. Il film mussa las sfidas da las persunas responsablas per il project, dals inschigners e dals miniers da perfurar ina segunda giada il massiv da l’Alvra. In duel tranter muntogna e maschina. In congual tranter vegl e nov. In viadi tras 5'860 meters istorgias, da l’emprima palada fin a la realisaziun. Il nov tunnel vegn inaugurà dumengia, ils 9 da zercladur.
