La pli emprima scarsola che Johannes Lanicca ha fabritgà è anc adina en sia remisa a Flerden. Pli baud saja el gugent ì a scursalar, e cunquai ch'i na deva betg propi bunas scarsolas da cumprar, haja el empruvà da far sez ina scarsola. Tar l'emprim model ha el anc laschà far las parts da fier dad in fravi. L'emprim model aveva in sez da lattas ed era anc detg grev. E tuttina haja el da lezzas uras magari fatg ina buna posiziun tar ina u l'autra cursa da scursalar ch'il deva lura anc pli savens che ozendi.
Sviluppà vinavant durant in decenni
Fin che Johannes Lanicca era propi cuntent cun sias scarsolas haja duvrà in pulit mument; durant diesch onns haja el adina puspè midà ed optimà ses «Heinzenberger». Cun il model sco el è oz, è el cuntent, quel bajegia el schon 20 onns en quella furma. Las lattas per seser èn remplazzadas cun in polster, quai saja per l'ina pli cumadaivel e spargnia lavur, e per l'autra saja il product final pli lev. Il scrinari pensiunà fa sez tuttas lavurs, er ils schlusigls da metal. Fabritgar scarsolas è daventà hobi sper la lavur sco scrinari en l'atgna fatschenta. Ed er suenter la pensiun na stattan las maschinas en ses lavuratori betg eri dal tuttafatg, il hobi è daditg daventà passiun.
Usché ditg co jau poss fatsch jau vinavant cun mes «Heinzenberger».
Davent da l'entschatta dovra Johannes Lanicca lenn da fraissen indigen per sias scarsolas. Mintg'enviern fa el ina seria da circa diesch scarsolas, durant il november e december. Ils «Heinzenbergers» datti da cumpar davent da 500 francs. Ils models per duas persunas u quels cun mesiras individualas custan in zic dapli. Las scarsolas sajan da viadi en l'entir chantun Grischun sco per exempel en la Val Schons, a Tavau, en Tumleastga ubain en il Partenz e schizunt en il Vallais haja el gia pudì furnir in. Las bleras scarsolas ch'el vendia, vegnian cumparadas sco regal per exempel per in batten u la confirmaziun u ina nozza. E gist qua stima il scrinari pensiunà il pli fitg vida quella lavur, ch'el fa insatge che la glieud ha plaschair. Ina scarsola saja insatge ch'ins haja per vita duranta.
Jau fatsch ina cursa d'emprova cun mintga singula scarsola che jau hai fatg.