Actualmain vegn construida la nova praschun Cazas Tignez en proxima vischinanza dal stabiliment giudizial avert Realta. Il mument che la praschun vegn averta po ella occupar fin a 152 praschuniers en sias localitads da mastergn.
I vul lavur per 152 praschuniers
Questas novas localitads èn impurtantas, perquai ch'ils praschuniers èn obligads tenor lescha da lavurar. Circa la mesadad dad els duajan realisar products e servetschs per il martgà extern. Quai vul dir lavurs d'emballadi e da confecziun, liquidar lavurs da scrinari, da montascha e da recicladi – ed er surpigliar incumbensas d'auters secturs.
Occurrenzas d'infurmaziun per ils interessads
Pussaivels patruns da lavur da l'industria e da la masternanza èn vegnids infurmads a Cazas directamain da l'Uffizi per l'execuziun giudiziala da tut quai, che l'infrastructura industriala da la praschun Cazas Tignez pudess porscher.
La mesemna han il cusseglier guvernativ Christian Rathgeb, schef dal departament da giustia, segirezza e sanadad, e la direcziun da l'uffizi per l'execuziun giudiziala, timunà dal manader da l'uffizi Matthias Fässler, mussà l'impurtanza da la lavur dals praschuniers ed han orientà davart las pussaivladads da producziun en ils novs lavuratoris.
La lavur dals praschuniers ademplescha bleras incumbensas
Lavur adattada per praschuniers ha dad ademplir bleras funcziuns. Las persunas duajan pudair emprender ed exercitar sin ils champs professiunals. Uschia duajan ellas er savair rinforzar la fidanza en las atgnas abilitads e survegnir sustegn per activar il potenzial individual.
Las abilitads che vegnan promovidas uschia permettan da meglierar las schanzas ad ina vita senza chastis suenter la relaschada. Ultra da quai portan ils lavuratoris er raps a la praschun Cazas Tignez e gidan uschia da reducir ils custs da la detenziun.
-
Bild 1 von 3Legenda: Actualmain anc en construcziun: Las duas hallas d'industria (mellen/blau), la scrinaria (cotschen) e l'atelier (rosa). Chantun Grischun -
Bild 2 von 3Legenda: Il team dal chantun tar l'infurmaziun: Christian Rathgeb, Mathias Fässler, Ines Follador e Nina Albin (da san.). RTR, Federico Belotti
-
Bild 3 von 3Legenda: En radund in onn duai la praschun avrir. RTR, Federico Belotti
Ils manaschis da la praschun – partenaris, betg concurrenza
La praschun Cazas Tignez s'orientescha – sco ils manaschis da l'economia privata – vi dals basegns dal martgà. Ses pretschs sa drizzan tenor ils pretschs cumparegliabels da l'economia libra. Ils manaschis industrials da la praschun Cazas Tignez sa chapeschan sco partenaris e betg sco concurrenza da l'economia indigena ed èn pia zunt interessads vi da cooperaziuns.
Quai cuntegna er la pussaivladad da pudair producir e fabritgar en pitschnas quantitads. Ils locals multifuncziunals da las duas hallas d'industria, da la scrinaria e da l'atelier stattan pia a disposiziun per ils basegns da producziun individuals da l'economia grischuna.
RR actualitad 17:20 / TSG 17:40