Senza avair gì in uffizi politic è Luzi Schutz vegnì elegì cun ina gronda maioritad sco president communal da la nova vischnanca fusiunada Bravuogn Filisur. Sco quai ch’el ha ditg a RTR haja el entschet bain. Ils emprims 100 dis sajan stads intensivs ed el haja lavurà franc 100% per la vischnanca. Pli tard, cura ch’el saja lura pli franc en ils differents dossiers, saja la plazza sco president communal dentant franc dumagnabla cun ils 50% ch’ella è dotada.
Grazia la contribuziun da 8.8 milliuns francs ch’il chantun ha pajà per la fusiun, èsi stà pussaivel da reducir ils debits che muntavan l’onn passà a bun 20 milliuns francs. Ina finamira a lunga vista è era da pudair reducir en l’avegnir las taxas ed il pe da taglia sin il livel da las vischnancas vischinas, ch’han in pe da taglia d’enturn 100% da la taglia chantunala simpla, ha ditg Luzi Schutz.
Archiv na cuntenta betg
Autras finamiras dal president communal èn d'adattar las differentas taxas che sajan per part fitg differentas a Bravuogn ed a Filisur. El veglia dentant sa pigliar avunda peda. La finamira saja d'avair ina soluziun cuntentaivla entaifer trais onns.
Bler da far dettia era l’archiv da Bravuogn, che na saja betg en in stadi cuntentaivel.
RR actualitad 11:00
