-
Bild 1 von 3Legenda: Era il tetg dal perrun e rest nov. RTR, Gierina Gabriel -
Bild 2 von 3Legenda: Or da trais binaris èn daventai dus cun in nov perrun. RTR, Gierina Gabriel
-
Bild 3 von 3Legenda: Plantà tigl: Peter Jaggi, Reto Loepfe, Renato Fasciati, Werner Glünkin (AEV), Christian Florin (da sanester). MAD
Per inaugurar la nova staziun da Razén ha il directur da la Viafier retica Renato Fasciati ensemen cun il president communal da Razén Reto Loepfe plantà in nov tigl. Preschents eran era il responsabel da l’infrastructura da la Viafier retica. Cun plantar quest tigl han ins d'ina vart remplazzà il tigl che ha stuì guntgir ord motivs da plaz. Da l'autra vart vul la Viafier retica era mussar ch'ella è interessada ch'ins resguarda il confort per la clientella tar ina renovaziun d'ina staziun.
Sco che la Viafier retica ha communitgà, era la staziun da Razén antiquada e perquai han ins era stuì modernisar ella. Ils davos dus onns haja ins investì totalmain set milliuns francs e bajegià enturn la staziun tenor ils basegns da persunas cun impediments. Fin uss èn 37 da 103 staziuns da la Retica adattadas per persunas cun impediment.
Staziun favuraivla per la clientella
Razén è per la Viafier retica in punct central che colliescha tren e bus. Il nov perrun aut binari 1 è oz in perrun cumbinà tranter bus e tren cun cuvriment da tetg. Plinavant è la fatschada da l'edifizi da la staziun vegnì renovà. La staziun da Razén aveva pli baud trais binaris, oz èn quai be pli dus per cruschar. Ils urs dal perrun èn sin ina lunghezza da 150 meters illuminads.
Adattaziuns per persunas cun impediment
Cun la nova staziun a Razèn èn 37 da 103 staziuns dalla Viafier retica adattadas per persunas cun impediment. Tar questas staziuns saja il perrun sin la medema autezza sco l' entrada dal tren. «Uschia hai nagins stgalims ed ins po entrar senza problems cun la sutga da rodas, cun il rollatur u il car d' uffants», declera Christian Florin, manader infrastructura dalla Viafier retica.
Pro infirmis giavischa meglra collavuraziun
«Fin 2023 vegnin nus ad avair ademplì las pretensiuns da la lescha davart l' egualitad da persunas cun impediments», uschia Florin.
Quai na vul dentant betg di che tut las 103 staziuns èn adattadas per persunas impedidas. 51 staziuns sajan cumplainamain adattadas e tschellas sappian vegnir duvradas cun mesiras d' agid. Pli critic tuna ei tar l' organisaziun per impedi pro infirmis. Els giavischassan ina collavuraziun pli stretga, sco quai che Roman Brazerol declera envers RTR.
RR actualitad 17:30