En il futur veglian ins sa concentrar sin collavuraziuns en Val Schons. Uschia prevesa la Lia Rumantscha da collavurar cun il Center da Capricorns a Vargistagn: «Nus vulain tschertgar collavuraziuns cun auters partenaris, ed uschia profitar da sinergias», ha ditg Carmen Dedual, la manadra da las activitads generalas tar la Lia Rumantscha.
Sin la tschertga d'in collavuratur stabel
Ins saja però anc adina sin la tschertga d’ina collavuratura u in collavuratur stabel per la Val Schons. Quel vegniss a lavurar da nov en in biro en il Center da Capricorns a Vargistagn, uschia Carmen Dedual. La Lia Rumantscha vul era en l’avegnir porscher Cafés Rumantschs, inscunters emnils per persunas che han gust da discurrer rumantsch. Era duai dar inscunters mensils en Val Schons, nua ch’i vegnan preschentads novs products.