![La tensiun crescha, ils 20 da settember vegn elegì.](https://www.rtr.ch/static/cms/images/960w/e03ab6.jpg)
Leo Thomann ha 59 onns, è commember da la Partida liberaldemocratica svizra (PLD) e viva a Parsonz. El ha trais uffants creschids ensemen cun sia dunna Gaby Thomann, ch’è dapi l’onn passà deputada da la PLD en il Cussegl grond a Cuira.
Gia passa 30 onns lavura Leo Thomann sco selvicultur da revier. Ussa para il temp d’esser madir per el da cumenzar ina nova carriera: «La politica ha adina interessà ferm a mai, per mai èsi ina gronda sfida da metter ensemen las nov vischnancas ch’han fusiunà e da guardar che quest travagl funcziuna».
Las collavuraziuns èn flaivlas
Il grond problem en la val vesa el tar las collavuraziuns. Fin ussa haja la collavuraziun betg funcziunà fitg bain tranter las nov vischnancas, e quai surtut en il sectur dal turissem. Suenter la fusiun spera el, ch’i vegnia en il futur pli simpel da realisar projects, uschia Leo Thomann.
Savognin ha fatg buna lavur.
Quai che pertutga l’hotellaria vul il candidat per il presidi cuntinuar cun l’engaschi, ch’è per exempel vegnì da la vischnanca da Savognin: «La lavur che Savognin ha fatg enfin ussa giuditgesch jau sco fitg buna, qua vuless jau cuntinuar - fin ussa hai dà blers projects en la val, ma pauc è vegnì realisà. Ussa è vegnì il temp da realisaziun». Cun porscher terren favuraivel vul la vischnanca da Savognin promover projects da novs hotels.
Toleranza vicendaivla è dumandada
Quai che pertutga la lingua uffiziala en la vischnanca nova, qua spera il nov president communal sin la toleranza vicendaivla da las persunas da lingua tudestga sco era quels da lingua rumantscha: «Cun ils meds tecnics che nus avain oz èsi pussaivel da manar la vischnanca uschia che tuts chapeschan per tge ch’i va», uschia Leo Thomann che spera da survegnir paucs cedels vids ils 20 da settember, il di d’elecziun.
L’elecziun è quasi segira cunquai ch’il candidat na sto betg cuntanscher in tschert dumber da vuschs ed autras persunas na pon betg vegnir elegidas sco president communal. Per ils 4 posts en suprastanza datti 8 candidats.