Grischun Central - Lavurs per nov’ovra idraulica a Tinizong èn sin buna via

Sco quai che Thomas Richli, il manader da project da las Ovras electricas da Berna BKW ha ditg, saja enfin ussa tut ì tenor plan: «Da las lingias da pressiun avain nus gia tschentà bun 90%, ed a Tinizong è gia vegnida construida la centrala, nua ch’i vegnian anc quest onn installadas las turbinas». Il pli grond plazzal sa chatta a Tgant Pensa, questas lavurs cuzzian anc enfin la fin d’october, ha ditg Thomas Richli.

Fin 400'000 francs entradas

En funcziun duai l’ovra electrica ir il matg 2016. La vischnanca da Tinizong-Rona (a partir dal schaner 2016 la vischnanca fusiunada Surses) sa participescha cun 20% (1.2 milliuns francs) vi dal chapital d’aczias. Tenor il chanzlist e commember dal cussegl d'administrazin da la Ragn d'Err SA Mario Dosch saja da quintar cun entradas da 200’000 – 400’000 francs entradas ad onn. La Ragn d’Err SA cun sedia a Tinizong, consista da las Ovras electricas da Berna BKW, e la vischnanca da Tinizong-Rona.