Valerio Leccardi (34) da Tavau è trenader, psicolog, massader, um da service ed organisatur per ses atlets da la squadra naziunala australiana. El è dentant er sez atlet. Il passlunghist è il 2010 stà per la Svizra als gieus olimpics da Vancouver en il Canada.
Planoiras sco preparaziun
En vista al campiunadi mundial da juniors en Finlanda la fin da schaner ed il campiunadi mundial dals activs il favrer a Seefeld nizzegian ils Australians che treneschan savens a Tavau la cursa populara dal Planoiras sco preparaziun. Cun esser dentant anc adina en furma e mai avair communitgà la fin da la carriera vegn Leccardi er ad esser a la partenza da la cursa la dumengia. Ed uschia pudessi esser ch'il trenader è il pli spert «australian».
Dunna australiana
Sia dunna, l'anteriura passlunghista australiana Esther Bottomley è stada il motiv per scuvrir avant divers onns il sport en l'Australia. Il 2017 è el vegnì trenader naziunal.
RR actualitad 17:00