La finanziaziun è garantida; sustegn datti dal chantun, da la confederaziun e da l’agid da Muntogna. Quai ha ditg Luzi Steier, il president da la societad chascharia Savognin e conturn. Anc quest mais cumenzan la lavurs da sanar las maschinas da chaschar, che duessan survegnir ina cumplettamain nova electronica. Gia a partir da quest atun duess puspè vegnir producì il chaschiel da muntogna da Savognin. Vendì vegn quel en la butia da la chascharia ch’è gia averta. Ulteriurs cumpraders stoppia la chascharia dentant anc chattar, cun quai ch’i saja grev da promover in product che na saja betg anc sin la fiera, uschia Luzi Steier.
Bergsenn schlia tut ils contracts cun Savognin
L’anteriura locataria da la chascharia da Savognin, la Bergsenn SA - ina figlia da la Migros - è sa retratga la fin dal 2016 da Savognin. Il mument surpiglia ella anc tut il latg dals purs da Savognin e conturn. Uschè spert ch’i vegn puspè producì a Savognin, na va nagin latg da Savognin pli a Mustér. Per il latg ch’è danvanz e na po betg vegnir elavurà a Savognin, sto la societad da chascharia Savognin e conturn anc definir in cumprader, ins saja en tractactivas cun duas firmas da la Bassa, ha ditg Luzi Steier.
RR novitads 06:00