Quests dis ha la secziun Albula Surses da Gastro Grischun fatg festa da giubileum per ils 75 onns d'existenza. Per il futur e las sfidas che spetgan è la secziun pronta. La suprastanza è sa regiuvinada e per la presidenta Janine Arpagaus è in dals temas centrals da collavurar anc pli stretg en futur. Cun cooperaziuns possian ins per exempel er porscher events pli gronds ed ins haja ina vusch pli ferma.
Regurdanzas
Rico Schnöller è gastronom e hotelier da la garda veglia. Dal 1978 enfin il 1988 è el stà president da l'uniun e passa 60 onns accumpagna l'uniun sia vita.
Per el è la branscha sa sviluppada bain, i dettia dentant er ussa grondas sfidas. Insatge ch'el vesa cun egls critics è ch'i manchia adina pli savens la basa d'ina scolaziun dal fatg a las persunas che surpiglian in manaschi.