«Il plan b sto esser insanua tranter signal da traffic e tunnel, impurtant è ussa dad analisar la decisiun dal Tribunal federal ensemen cun la vischnanca», ha ditg Mario Cavigelli, il parsura da l’uffizi da construcziun e traffic envers RTR. Enfin ch’in nov project po vegnir realisà, possia quai dentant anc ir plirs onns.
President communal è trumpà
Tar la vischnanca èn ins trumpà suenter la decisiun dal Tribunal federal: «Il Tribunal federal ha valità pli aut la protecziun da la natira che la protecziun da l’uman – pertutgads èn surtut quels che abitan a Ferrera, e quels ston ussa probabel puspè spetgar plirs onns sin ina nova schliaziun», ha ditg Hubert Weibel, il president communal da Ferrera.
Tribunal federal vul proteger la cuntrada
Ier è vegnì enconuschent, ch’il Tribunal federal vul evitar, che la cuntrada da terrassas vegnia unfrenda d’in nov vial. Tranter auter vegn argumentà, ch’i sa tractia d’ina cuntrada che vegnia abitada dad insects, utschels e reptils che sajan per part periclitadas. La dretgira administrativa dal Grischun aveva anc refusà in recurs da las organisaziuns da l’ambient.
RR actualitad 17:15
