El saja stà avant varga trent'onns l'emprim ch'haja producì «mini-donuts» en Svizra. Er bunamain trent'onns – cun excepziun da paucs onns – è Manfred Lüchinger cun ses stan da donuts, craclins, vin chaud ed autras mangiativas e bavrondas a la Cuppa Spengler.
In temp intensiv, bel e finanzialmain interessant
Durant quai temp giaudan el e ses collavuratur, che è medemamain in bun ami, l'atmosfera a Tavau tranter Nadal e Bumaun. Ma intensiv saja il temp tuttina, ils dis da lavurar cuzzian quasi adina pli ditg che 12 uras.
Per motivs finanzials saja il temp da la Cuppa Spengler per el in temp interessant. Uschiglio charrescha el cun ses stand da festa a festa tras l'entira Svizra. Quant ch'el stoppia pajar per il plaz a Tavau e quant ch'el gudognia durant quel temp, na leva l'um da Montlingen dentant betg tradir.
RTR novitads 11:00