Var 40 onns han ils dus territoris gì da spetgar sin quest di: Ils 18 da schaner 2014. Dapi quest di èn ils dus territoris da skis d'Arosa e da Lai colliads ed èn cunquai sa sviluppads da dus territoris da grondezza mesauna tar il pli grond territori da skis dal Grischun ed in dals pli gronds da la Svizra.
Quai haja purtà bler als dus territoris. Els hajan – grazia a la nova grondezza – pudì sa posiziunar ad ina nova moda e maniera ed attrair blers giasts, sco quai ch'ils dus CEOs dals territoris da skis Thomas Küng (Lai) e Philipp Holenstein (Arosa) dian.
Omadus territoris sajan oz meglier vidlonder ch'anc avant diesch onns e possian cunquai far investiziuns en la qualitad da la purschida existenta. Cunquai ch'els hajan ina purschida uschè gronda e variada possian els era pretender in tschert pretsch, quel ch'i dovria era per mantegnair in territori da skis da questa grondezza. I saja dentant in pretsch giustifitgà per quai ch'ins survegnia. E la glieud saja anc adina pronta da pajar quest pretsch. La colliaziun dals dus territoris saja stada ina da las meglras decisiuns che sajan vegnidas fatgas per Lai ed Arosa, suttastritgan ils dus CEOs.
