Tuts na pon ins mai cuntentar. Sch’ils ins serrassan gia il territori, sbragissan auters da tegnair avert entant ch'i dat anc la pussaivladad. E si Bravuogn sa tegn'ins per il mument anc vi da quella devisa. Sch'i dat anc la pussaivladad dad ir cun skis ni schlitra, enfin lura giran era las sutgeras e runals. Mo in runal e duas pistas han‘ins gia stuì serrar pervi da mancanza da naiv. Tut il rest da la purschida è anc avant man.
Situà bain e cun agid da cumpromiss
Naiv artifiziala han mo las dus pistas da schlitra e parts da la pista da skis che maina dal restaurant fin giun val. Tut il rest dal territori è dependent da naiv natirala, ch'è quest onn fitg stgarsa. Tuttina, grazia che la part principala dal territori da skis n'è betg expost al sulegl durant tut il di ed er sur il cunfin dal guaud, datti là anc pistas cun fitg bunas cundiziuns.
Per arrivar si là ston ils giasts ir en in cumpromiss e prender suenter la sutgera puspè aval fin tar la staziun d’amez. E per giudair anc la pista giun val ston’ins chaminar sur il pastg per var 20 meters.
La chapientscha dals giasts è extrem gronda. Mintgin che vesa, quai che va ed è avert, è bun. E cunter il rest na pudainsa far nagut.
La speranza è gronda che Bravuogn dumogna da tegnair avert ses territori enfin la fin da lur stagiun, ils 12 da mars.