Bravuogn - Ava da Tuors è sviada – ils quitads restan

Per decider co stuppar il meglier la rusna hani uss engaschà speleologs che documenteschan las profunditads dal sistem da cuvels.

Sco quai che Luzi Schutz, il president communal da Bravuogn Filisur ha ditg, spera el che las lavurs possian finir anc avant la primavaira, cura che la naiv lieua e lascha puspè cular dapli aua giu da l’Ava da Tuors.

Problem da l'aua resta

Era sche l’aua da l’Ava da Tours cula il mument grazia al provisori puspè en ses letg usità, fa l’aua che cula en il terren anc adina problems. Tar il Crap da Bravuogn / Bergünerstein tranter Filisur e Bravuogn, sa furman chandailas da glatsch che l’uffizi da construcziun bassa sto allontanar per raschuns da segirtad.

Auts custs per la vischnanca

La vischnanca haja gia investì 300'000 francs en las mesiras, plirs tschientmillis francs vegnian anc a suandar. Luzi Schutz è da buna speranza ch’il chantun sa participescha vi dals custs. Ina dumonda saja gia fatga. Plinavant spera el ch’era firmas participadas pajan ina cumpart da las lavurs, sco per exempel l’ovra electrica che nizzegia l’aua dal aual.