En connex cun la disgrazia da lavina a Bivio datti ina segunda victima – l'um ch'era vegnì transportà en in stadi critic en l'ospital chantunal a Cuira è mort il venderdi. La Polizia chantunala ha confermà a l'agentura da novitads Keystone-SDA ina communicaziun correspundenta da l'agentura a novitads taliana Ansa.
Sur Bivio èn dus skiunzs da turas talians vegnids tschiffads la gievgia avantmezdi dad ina lavina. In dad els hajan ins be pudì chattar mort, ha la Polizia chantunala scrit. L'auter sa chattava en stadi critic ed è vegnì sgulà en ospital, ed in terz saja mitschà da las massas da naiv. Ils trais skiunzs sajan vegnids tschiffads da las massas da naiv durant ch'els eran vi da descender dal Piz Grevasalvas en direcziun Bivio. Trais helicopters e dus teams cun chauns da lavinas èn stads en acziun per salvar ils skiunzs da turas.
La polizia chantunala e la procura publica intercureschan l'accident.
