L’onn 2013 aveva il suveran d’Andeer decidì en ina votaziun consultativa, che la vischnanca duess elavurar in concept da parcar. Quai per quietar il traffic tras vischnanca e per schliar il problem d’autos che parcheschan durant in lung temp sin parcadis publics. Suenter lungas discussiuns è il concept da parcar vegnì refusà da la radunanza communala. Tranter auter è vegnì crititgà che las taxas da parcar per cartas per in mais sajan memia charas cun 50 francs al mais.
Cun laschar parcar gratuit trais uras ed avair ina tariffa pli bassa sin ils parcadis a las duas entradas da la vischnanca sperava la suprastanza communala, che pli paucs autos passan tras il center. Andeer quintava cun almain 40'000 francs entradas ad onn entras las taxas da parca. Ma cun quai che quellas èn vegnidas refusadas, resta tut sco enfin qua, ed i vegnan installadas naginas uras da parcar. Ad Andeer datti radund 160 parcadis sin il spazi public.
