Andeer - Accident mortal en tunnel da Rofla

Sin l’autostrada A13 hai gievgia avantmezdi dà in grev accident en il tunnel da Rofla. Ina persuna è morta, duas ulteriuras èn vegnidas blessadas, quai scriva la Polizia chantunala. Tenor emprimas enconuschientschas èn dus autos collidads en il tunnel. In auto saja cupitgà e collidà cun la paraid d'ina nischa en il tunnel. Il manischunz è mort al lieu. Ils passagiers da l'auter auto èn vegnids transportads cun blessuras mez grevas en l’ospital. Pervi da l’accident è la via stada serrada quatter uras per camiuns. Per autos hai dà in sviament sur la via chantunala.