La senda da viandar da ditgas a Beiva datti gia dapi l'onn 2018. Cunquai ch'i ha pretendì intginas midadas – ha l'organisaziun turistica da la Val Surses vis la chaschun dad adattar ella uschia, ch'ella daventa era accessibla per glieud tschorva u cun in impediment da la vesida. Quai è capità en collavuraziun cun Grischun Vacanzas – ed en il rom dals dis d'acziun «dretgs da persunas cun impediment» en Svizra.
Uschia è il turissem sa mess ensemen cun la «Federaziun svizra dals tschorvs ed impedids da vesida» per testar la senda, e chattar ils obstachels che n'èn magari betg evidents per la glieud che vesa. Actualmain n'è betg anc realistic ch'ina persuna tschorva po chaminar l'entira senda a Beiva senza accumpagnament d'ina persuna vesenta, cunquai ch'i dat anc l'in u l'auter obstachel. La finamira saja dentant che quai saja en l'avegnir pussibel.
Per pudair chaminar la senda po la persuna tschorva u cun impediment da la vesida chargiar la ruta sin ina app. A maun dal GPS di quella app lura cura ch'ins ha da chaminar en tge direcziun – e dat en general infurmaziuns specificas per persunas tschorvas. E cunquai che la senda è ina senda tematica, raquinta il telefonin lura mintgamai differentas ditgas sch'ins arriva tar in dals posts.
Dapi questa stad datti en il Grischun quatter talas sendas da viandar tematicas, ch'èn adattadas era per glieud tschorva u impedida da vesida. Questas sendas èn da chattar a Beiva, Sursaissa, Scuol ed Arosa.
