Corina Beeli è oriunda da Spleia e viva cun ses um ed ils quatter uffants a Cuira. La dunna da 40 onns ha dentant era ragischs en la Val Schons. Sco giuvna saja ella mintgatant stada a Dumagns, l'acla sur la vischnanca da la Muntogna da Schons sin 1'800 meters sur mar al pe dal Piz Beverin. Lura dentant mo sin visita tar tat e tatta ch'eran a culm per far fain la stad. Quai è dentant sa midà dapi ch'ella ha sezza famiglia.
Corina Beeli ha pudì surpigliar la tegia e dapi tschintg onns fa la famiglia mintga stagiun vacanzas en la tegia a Dumagns. Las vancanzas sin il culm muntan per ella ina vita pli simpla: L’aua vegn purtada dal bigl in toc sur la tegia, i na dat nagina duscha, mo ina simpla latrina per far ils basegns e cuschinà vegn sin il fieu. Atgnamain na cuschinia ella betg gugent. A culm saja quai dentant auter, di Corina Beeli. Ella possia far tratgas simplas e quai fetschia ella gugent. A Dumagns vegnia ella da sa revegnir stupent dal mintgadi en la citad cun ils quatter uffants.
Suenter ina stad a Dumagns hai jau durmì uschè bler ch'i tanscha per il rest da l’onn.
Er als uffants plaschan las vacanzas en tegia. Lungurus na saja prest mai – sin il pli durant dis da trid'aura. Malgrà ch'i plascha als uffants a Dumagns, giessan els bain era gugent puspè ina giada en vacanzas sper la mar. La mamma Corina Beeli tradescha che la famiglia vegnia franc er insacura puspè a far vacanzas sper la mar. Malgrà ch'ella giaudia la vita simpla en tegia: Suenter duas, trais emnas a Dumagns haja ella era plaschair da puspè avair tut il confort dal dachasa a Cuira, sco per exempel la duscha, in'endretga tualetta e surtut la maschina da café. Suenter in temp haja ella propi bavì avunda «Incarom» u «Bialetti».
Sin las aclas grischunas n'entaupan ins betg mo indigenas ed indigens che giaudan in pèr dis en ils auts u purs che fan fain. Davant las tegias ves'ins savens er autos cun numers da la Bassa. Davant ina da las tegias a Dumagns stat regularmain l'auto da Martin Binggeli cun il numer d’auto da Basilea. El ha ragischs en Val Schons, sia mamma è oriunda da Ziràn. Sco dunna giuvna è ella s'inamurada ed ida giu la Bassa per lavurar a Basilea ed è restada. Il 1968 han ses geniturs gì la chaschun da bajegiar ina tegia a Dumagns, uschia ha Martin Binggeli il cletg d'adina puspè pudair turnar.
Il temp che jau hai dastgà passentar sco buob e giuvenil en Val Schons, quai èn las pli bellas regurdientschas che jau hai.
Sco buob e giuvenil ha l'um da 65 onns dentant passentà bler temp en Val Schons. Durant las vacanzas da stad ha el gidà a far fain ad in pur da Casti, ed er blers atuns ha Martin Binggeli passentà en Schons e sin l'acla Dumagns. Cura che Martin Binggeli raquinta da sias regurdientschas d’uffanza e giuventetgna en Val Schons, traglischan ses egls. La tegia a Dumagns è ses grond paradis.
Cura che jau travers la Viamala ed arriv en Val Schons, è quai sco da vegnir a chasa – quai è patria.
Dapi ch'el saja pensiunà na stoppia el betg pli guardar sin il chalender e planisar cura ch'el veglia vegnir in pèr dis a culm. Ussa saja el pli liber e guardia plitost sin l'aura. Savens accumpogna sia dunna el. Dentant vegn Martin Binggeli er sulet en tegia per laschar reviver il bel temp da sia uffanza e giuventetgna ch'el ha dastgà passentar qua, en Val Schons, sia patria dal cor.
