Per tge vai?
La moziun per introducir in model da direcziun è vegnida inoltrada gia avant quatter onns. Igl ha duvrà duas lecturas dals singuls statuts per in model da direcziun che separa la strategia communala dals duairs operativs.
Avant quatter onns ha la suprastanza communala da princip sustegnì l'idea d'in tal model. La suprastanza nov’elegida ha bain elavurà ensemen cun ina cumissiun ils detagls ed il messadi correspundent en il senn da la moziun. Tuttina han els fatg la proposta da refusar in model da direcziun. In dals motivs principals è ch'i dettia cun ina direcziun in ulteriur stgalim hierarchic e quai na saja betg en il senn da l'idea oriunda da far tut pli simpel.
Model spezial per Vaz
Il model «Vaz» fiss stà unic en Grischun. Sper ina direcziun e la suprastanza communala fiss er restà il parlament, il cussegl communal. D'ina vart vulessan ins professiunalisar la vischnanca, da l'autra vart vegna tut pli cumplitgà, aveva resumà Maurin Malär, il president communal, intgins dis avant la votaziun. Sia gronda critica: «Cun in CEO po er ir a perder il fieu per la vischnanca».
Christoph Messmer ch'aveva inoltrà la moziun era dentant da l'opiniun che cun ina professiunalisaziun da la vischnanca e cun separar la part strategica da la part operativa gudagnassan tuts. Sch'i duvrass in di betg pli il cussegl communal, vegniss a sa mussar.
