La sfida principala en vista a la stagiun da skis 2022/2023 saja l'aura e la naiv, di Martin Vincenz. Però era da la situaziun difficila d'energia e l'economia pli debla è il mainagestiun da Grischun Vacanzas conscient. Tuttina spetga il turisticher in bun enviern. La prevendita da bigliets e d'abunaments e las reservaziuns en ils hotels sajan enfin uss bunas. Er Jürg Domenig da Hotelleriesuisse Grischun è dal avis ch'i dettia ina buna stagiun. Quai mussa era in studi da BAK economic. Las pernottaziuns èn fin uss autas, però quai po er anc sa midar, cunquai ch'igl è pir mez november.
Nus cumenzain adina cun las circumstanzas natiralas. Quai è il pli impurtant.
Eliane Bernasocchi-Volken, scheffa da la communicaziun da l'Arena Alva, conferma ina ferma prevendita. En vista a las sfidas che pudessan spetgar, han ins dentant preparà differents scenaris tut tenor tge che pudess capitar. I saja però grev da far previstas concretas, sco che la pandemia da Covid-19 ha mussà.
Dapli giasts da surmar
Sche tut va tenor plan spetgan ins sco adina en emprima lingia giasts svizzers che possian far or 50-80% dals giasts tut tenor destinaziun. Era giasts dals Stadis dal Benelux e da la Gronda Britannia vegnan spetgads. Vinavant fa Grischun Vacanzas quint cun in augment da giasts da surmar, pia dals Stadis Unids u da l'Asia. Jürg Domenig, il mainafatschenta da Hotelleriesuisse Grischun spetga er ina differenza tranter las regiuns. Destinaziuns cun blers giasts esters sco Tavau Claustra e San Murezzan han meglras prognosas. Da l’autra vart han destinaziuns cun giasts da la Svizra da far quint cun ina diminuziun da pernottaziuns.
Nus stain davant grondas sfidas ed igl è surprendent quant bunas che las prognosas èn.
