Grischun - Adina dapli parts dal Grischun èn isoladas

Curt e concis

• Pervia dal privel da lavinas datti restricziun en il traffic sin via e sin binari.
• Samignun e la Val Müstair èn isolads pervia dal privel da lavinas.
• l'Engiadina Bassa e mo cuntanschibla sur il Vereina.

En il Grischun chattan ins la dumengia bellas cuntradas d'enviern. La ferma navaglia ha però er consequenzas che fan pli pauc plaschair:

La Val Müstair è isolada enfin almain mardi: il Pass dal Fuorn resta serrà. Er Samignun è isolà e l'Engiadina Bassa è da cuntanscher be tras il tunnel dal Vereina – e quai mo fin dumengia saira a las otg. Davent da las otg vegn la via tranter Giarsun e Lavin serrada. Lura è er L'Engiadina Bassa tranter Ardez e Martina isolada.

Er en l'ulteriur Grischun datti restricziuns da traffic

Ma era la situaziun en l'ulteriur Grischun vegn adina pli precara. Il suentermezdi eran singulas vias e singuls trajects da la Viafier serrads. En il decurs da la saira serran dentant adina dapli vias . Quai pertutga cunzunt er la Surselva.

Ed a Tavau han las autoritads ordinà a 20 chasadas dad ir en localitads segiras la saira.

Grond privel da lavinas

En il Nord dal Grischun è mo il pass dal Lucmagn serrà. Il privel da lavinas è dentant er en il Nord grond. Tenor l'institut da naiv e lavinas a Tavau vala in privel da lavinas 4 - pia il segund aut stgalim

RR novitads 06:00