Igl è in mument decisiv per la giustia en il chantun Grischun: Cun la fusiun da la Dretgira chantunala e la Dretgira administrativa l'entschatta dal 2025 è vegnida stgaffida la Dretgira superiura. La fusiun da las duas dretgiras è l'element essenzial da la refurma da la giustia 3 che las votantas ed ils votants dal Grischun han approvà la fin dal november 2022. Suenter var dus onns lavur da project èn vegnidas creadas novas structuras, tant en il sectur da la giurisdicziun sco era en l'administraziun.
Il start da la Dretgira superiura è reussì
La dretgira cun radund 50 collavuraturas e collavuraturs ha cumenzà ses affars l'entschatta da quest onn. Suenter ina lunga fasa da preparaziun ed organisaziun sajan els ed ellas tut cuntents da finalmain pudair operar sco ina suletta dretgira, di il president da la nova dretgira superiura Remo Cavegn.
Per nus va in temp intensiv da preparaziun a fin.
Ina Dretgira – duas localitads
En in'emprima fasa vegn il manaschi da la Dretgira superiura a cuntinuar en ils dus lieus d'enfin qua en l'Obere Plessurstrasse 1 sco era en la Poststrasse 14 a Cuira. Previsiblamain envers la fin da l'onn succeda lura la midada da chasa en il nov sez da la dretgira en la Grabenstrasse. Là vegn l'edifizi statal – construi ils onns 1877/1878 – actualmain renovà.