Durant ses servetsch da circa tschintg uras porta el ina giacca plimetta, ina chapellina verda e guants – a Cuira poi vegnir fraid ed era buffar. Dentant ama Flurin Appenzeller d'esser circumdà da muntognas – quai era in motiv ch’el ha cumenzà ses studi a Cuira. Oriundamain deriva el da Basilea e fa bler sport. Uschia n'è la lavur sco currier da velo era betg propi stentusa per el.
Mintgatant part jau 20 min memia tard dal biro, uschia ch'jau hai in zic ina sfida da far tut.
Sin las vias da Cuira en il traffic ha el in detg tempo cun ses velo. Enturn stortas u rundellas pari ch’el ha ina gronda fiduzia en ils auters participants da traffic. Flurin Appenzeller raquinta ch’el haja schon gì intginas situaziuns delicatas sin via, el saja crudà, restà fermà en il binari dal tren u ch’in auto saja vegnì propi datiers. I para dentant ch’el piglia quai tut patgific – durant ir cul velo chanta e tschivla el. Tranteren possia dar ch’el vegnia sut squitsch da temp cura ch’el survegnia bleras incumbensas per in servetsch. En sias boxas u en il char annex èn cudeschs, medicaments, fluras e conservas da sang. Per lung temp ha Flurin Appenzeller pensà ch’el haja in job fitg impurtant:
Jau hai pensà che jau port era organs ad ospitals. Ina giada m'è crudà giu ina boxa d’organs, alura m’han els raquintà che organs vegnian transportads cun la Rega e che jau transporteschia boxas vidas – lura sun jau stà surlevgià.
Ad el plascha la lavur sco currier da velo propi, era sche l’aura n'è betg adina agreabla dad ir cul velo. El sa mova gugent e la glieud è per gronda part adina engraziaivla, cunquai ch'il currier da velo è pli spert che la posta.