Favugn è creschi fitg ils davos 20 onns. Dumbrava la vischnanca il 2003 anc 2'076 abitants èn quai ussa prest 3'000. Er il svilup dal dumber da scolars e scolaras è remartgabel. Il 2003 eran quai 274, per l'onn da scola 2023/24 èn quai 411 scolaras e scolars. D'ina vart saja quai in svilup legraivel resumescha il president communal Peter Camastral, da l'autra vart saja quai er ina sfida finanziala per la vischnanca. Auter che Domat u Panaduz n'haja Favugn betg ina gronda firma che paja taglia sco persuna giuridica. Ils custs dentant, quels sajan qua.
Investiziuns da 20 milliuns francs
Ils proxims onns vuless Favugn investir radund 20 milliuns francs. Ussa il december decida il suveran davart in nov bajetg per la scolina ed adattaziuns per stanzas da scola. Suenter vuless la vischnanca in center da rimnada a l'ur da la vischnanca e gia divers onns exista il giavisch per ina halla da gimnastica traidubla – la veglia è er gia 50 onns en funcziun e na correspunda betg pli il standard. Ad ina saira d'infurmaziun ha Peter Camastral fatg il quint ed ha mussà las consequenzas finanzialas. Cun ina halla da gimnastica nova stuess vegnir auzà probablamain er il pe da taglia ed en congual cun las vischnancas vischinas muntass quai che Favugn avess cleramain in pe da taglia pli aut e perdess attractivitad per vegnir ad abitar.
Pass per pass
Per far il pass tenor la chomma vegn l'emprim decidì davart il nov bajetg da scolina ed il center da rimnada. En ina segunda votaziun alura da la halla da gimnastica. A la saira d'infurmaziun han ils responsabels er mussà che senza ina nova halla da gimnastica pudess il pe da taglia probablamain restar tar 95% da la taglia chantunala.
