L'artista da 40 onns è titulara dal premi d'art da l'Uniun grischuna d'art 2024. La dunna ch'è creschida si a Rodels pendulescha oz tranter Essen ed il Grischun. En l'installaziun «Ghost Note» che emplaina il spazi en il labor dal Museum d'art dal Grischun s'occupa ella da la regurdientscha.
L'installaziun «Ghost Note» da Bianca Barandun
-
Bild 1 von 4Legenda: Bianca Barandun Titulara dal premi d'art da l'Uniun grischuna d'art 2024 ed artista da l'installaziun «Ghost Note». RTR -
Bild 2 von 4Legenda: Las otg sculpturas da lain emplainan la stanza. Museum d'art
-
Bild 3 von 4Legenda: Quests spazis intermediars èn quels che dattan il tact al spazi. Museum d'art
-
Bild 4 von 4Legenda: Sch'ins sa mova tranter las sculpturas da lain, sentan ins in ritmus. Museum d'art
Cunzunt las observaziuns dals utschels en il curtin da ses geniturs a Rodels, sajan stadas ina impurtanta funtauna d'inspiraziun per l'artista da 40 onns che pendulescha regularmain tranter il Grischun ed Essen en tiara tudestga.
Il chantun Grischun è ina part da mes dachasa.
L'installaziun na duess betg mo esser insatge per il egl, mabain er insatge per il sentiment. Sch'ins sa movia tranter las sculpturas da lain, lura sentian ins in fin ritmus. Ins ni vesa ni auda quel. Tenor l'artista vegnia quest ritmus creà per l'ina cun la furma da las singulas installaziuns da lain, e per l'autra cun la distanza sco quellas sajan arranschadas entaifer la stanza. Quels spazis intermediars che resultan ordlunder, dettian lura quai «tun bufatg», per englais «Ghost Note».
Per mai èsi impurtant da pudair generar in ritmus cun ils divers objects.
Museum d'art vul tutgar «il puls dal temp»
Tut en tut 50 artistas ed artists èn envidads da mussar lur ovras en il rom da la «exposiziun annuala d'artistas ed d'artists grischuns» en il Museum d'art dal Grischun. L'exposiziun annuala dat ina survista da la lavur artistica acutala prestada en il e dal Grischun, e metta il medem mument il punct final al program d'exposiziun 2024.
Art che tutga «il puls dal temp»
-
Bild 1 von 4Legenda: Damian Jurt: Curatur da l'exposiziun annuala da las artistas ed dals artists grischuns. RTR
-
Bild 2 von 4Legenda: Art grischun: Ovras da Markus Weggenmann, Mirko Baselgia, Delia Sulser ed Evelina Cajacob (da dretg). Museum d'art
-
Bild 3 von 4Legenda: Art grischun: Maletg cun il num «Maria» da Zilla Leutenegger e la «Vischigia» da Michel Pfister. Museum d'art
-
Bild 4 von 4Legenda: Art grischun: Il maletg da Shannon Zwicker cun il num «Mountain of My Body» ed ina sculptura da Davina Andrea Deplazes, la pli giuvna artista. Museum d'art
Ina schuria decida, tgi che po exponer
La schuria che consista da tschintg persunas da la branscha da cultura è mintg'onn in'autra. Quai saja central per pudair valitar da moda faira las ovras dals 145 participants e las participantas. La fin possian ins porscher plaz mo a 50 dad els ed ellas, accentuescha il curatur Damian Jurt. S'annunziar per l'exposiziun dastgian dentant mo artistas ed artists cun in connex cun il Grischun: Uschia ston els ed ellas per exempel esser burgais dal Grischun, viver qua ubain avair las ragischs en il chantun Grischun.
La qualitad artistica è fitg impurtanta.
Trais tematicas han quest onn dominà l'exposiziun. Ina è la relaziun da l'uman e la natira; In'autra è la dumonda dad identitad e derivanza; e la terza è la valur da la lavur. L'exposiziun annuala saja definitivamain in spieghel da la societad ed in bun barometer, tge tematicas che fatschentian actualmain il mund.