L’Europeada ha la finamira da colliar diversas minoritads linguisticas e da crear in barat tranter las culturas – tranter auter en furma d’in turnier da ballape. Duas squadras rumantschas, ina da dunnas ed ina d'umens sa participeschan a la concurrenza ed emprovan da turnar a chasa cun il buccal. Sper il turnier da ballape datti en il rom da l’Europeada era in program cultural cun exposiziuns, discussiuns da podi e sairas cun musica.
Las squadras rumantschas èn prontas
Avant l’Europeada èsi gartegià da metter ensemen dus teams da ballape che vegnan a represchentar la Rumantschia durant l’occurenza. La chapitania da la squadra da dunnas Giuanna Caviezel declera ch’i haja dà difficultads da chattar avunda persunas che fan part da l’equipa da dunnas. Ellas sajan la finala dentant vegnidas ensemen cun 11 persunas. Intginas dunnas giogan en in club regiunal dal Grischun, autras na dattan betg regularmain ballape ma vulan represchentar la Rumantschia en l’exteriur. La motivaziun saja gronda e la chemia en la squadra buna.
Represchentar il rumantsch cun corp ed olma
La squadra da ballape da las dunnas gioga en ina gruppa cun teams ferms. Ellas vegnan a giugar cunter las Sidtirolaisas, Slovenas e Ladinas. Blers da quels teams giogan regularmain ballape ed hajan regularmain trenaments – quai che n’è betg il cas tar la squadra rumantscha. Malgrà quai vulan las Rumantschas mussar ina buna prestaziun sin il plaz – dentant cunzunt era represchentar il rumantsch sco tal encunter anora.
Grond sustegn per delegaziun rumantscha
Malgrà mancanza da giugaduras ha l’equipa da las Rumantschas pudì dar ils trais gieus da gruppa. Quai cun sustegn da giugaduras dad autras equipas. L’equipa rumantscha da las dunnas ha bain pers forfait tut ils trais gieus da gruppa. Grazia al sustegn han ellas dentant tuttina pudì dar ils gieus per plausch.
Quai na saja era insumma betg nausch ch’ellas hajan betg pudì concurrenzar las autras minoritads, di la chapitania Giuanna Caviezel. Anzi, i saja fitg bel, tge grond sustegn ch’ellas hajan survegnì. Quai saja quai che quinta, e quai ch'ina Europeada haja da represchentar: l’agid vicendaivel.
Agid vicendaivel – Quai è quai che quinta, e quai ch'ina Europeada ha da represchentar.
Rumantschs na fan betg furora a l’Europeada 2022
Sin il plaz n’han las equipas Rumantschas betg fatg furora a l'Europeada 2022. Las dunnas han mo dà ils gieus per plausch cun sustegn dad autras giugadras. Ils umens han pers ils trais gieus da gruppa ed èn crudads ora.
Mo a l'ur dal plaz haja la delegaziun rumantscha fatg la pli gronda canera, sco quai che Giuanna Caviezel di. Els sajan stads pli dad aut che tut ils auters fans ensemen.
Ord l'archiv
Quai è stada l'emprima Europeada il 2008:
L'emprima giada in'equippa da dunnas rumantschas a l'Europeada il 2016:
