Epidemias - Chantun exercita per cas d'ina erupziun da la grippa d'utschels

Uffizis dal Grischun e Glaruna han exercità il cas che la grippa d'utschels fiss vegnida chattada en trais manaschis. Tut las persunas involvidas hajan ademplì lur incumbensas, scriva il chantun Grischun en ina communicaziun.

L'exercizi ha gì lieu dals 8 fin ils 12 d'avrigl en las vischnancas Vaz Sut, Cazas ed Alvra. Involvids sajan stads l'Uffizi per la segirezza da victualias e per la sanadad d'animals, l'Uffizi da militar e da protecziun civila ed ina Divisiun principala da militar e da protecziun civila dal chantun Glaruna.

«En cooperaziun cun las autoritads, cun la protecziun civila, cun la firma da dismessa, cun partenaris privats e cun las possessuras ed ils possessurs d'animals è il cas d'epidemia vegnì exercità en moda realistica», scriva il chantun Grischun en ina communicaziun a las medias.

La grippa d'utschels tutgia tar las epidemias d'animals cun las consequenzas las pli grevas sin l'entir mund. Ils ultims trais onns saja la grippa d'utschels sa mussada tar plirs millis d'utschels selvadis en l'Europa. Ina svelta reacziun saja impurtanta per reducir ils donns tras ina tala epidemia.