Mintga dus onns duain ils «Singtage», l’inscunter da chant, avair lieu in settember a Zuoz. Quai in turnus cun il festival da teater «Travers». Ils trais dis èn stads emplenids cun chant e musica.
Concert da cumenzament
Venderdi saira en la baselgia San Luzi ha il cor Viva Voice pudì avrir ils dis da chant. Las plazzas en la baselgia èn stadas bain emplenidas. Suenter è il public er stà envidà per star a plaz en ustaria e chantar in u l’autra chanzun.
Vinavant en il program
La sonda han ils workshops, lavuratoris individuals, cumenzà. Cun dus manadras da cors, Clara Sattler e Sara-Bigna Janett, han ils visitaders e visitadras da quests lavuratoris pudì trenar lur vusch individualmain u er en pitschnas gruppas. Suenter il gentar han ils visitaders interessads pudì lavurar en in cor ad hoc cun in dirigent professiunal, Johannes Knecht, professur a la Scola auta da musica da Stuttgart. Là ha quest cor emprais chanzuns per preschentar la saira.
In bun mument
Il mument per far l’inscunter da chant saja tschernì per inspirar e motivar dirigents, chantadurs e chantaduras, uschia Curdin Lansel, iniziant da l'inscunter da chant a Zuoz. Las provas dals cors cumenzan l'atun, uschia che quests dis sajan in bun start per ils preschents e las preschentas.