Suenter in temp transitoric sut la batgetta dal vicepresident Ramun Ratti, ha Romeo Cusini surpiglià il timun da la vischnanca da Zuoz il prim da fanadur 2023. L’inschigner era vegnì elegì per la PLD a las tschernas da Chalandamarz.
Entant è il Zuozingher da 49 onns en uffizi dapi passa 100 dis. Durant quel temp haja el gia pudì emprender d'enconuscher la vischnanca or da punct da vista politic e sa deditgar a fitg differentas lezias. Il pensum per il presidi da Zuoz vegn inditgà cun 50%. Dentant surpassia quel marcantamain la cifra sin il palpiri.
Jau vi m’engaschar e dar tut per servir a la populaziun uschè bain sco pussibel. Quai pretenda da mai dentant er in pli grond engaschament.
Il tempo co ch’el vuleva oriundamain pigliar per mauns differentas fatschentas, ha il president nov elegì gì da reducir. Causa tut las proceduras politicas, duria tut pli ditg, uschia la conclusiun da Romeo Cusini. Dentant haja el gia instradà pliras mesiras ch’el vul cuntanscher durant sia emprima legislatura.
