La Via Valtellina maina sin l’anteriura ruta da viturins da sauma che vegniva duvrada per martgadar cun vin da la Valtellina. La via maina en sis etappas tras trais terras: l’Austria, la Svizra e l’Italia – e cun quai er tras trais regiuns culturalas e linguisticas.
Quest onn è ina gruppa da 56 persunas – tuttas vestgidas a la moda veglia – sa messa sin viadi per chaminar la via pretensiusa da 135 kilometers. Mintga di èn previsas var tschintg uras da viadi. Temp per far quest viadi a pè ensemen cun 19 animals, han las viandantas ed ils viturins da sauma in’emna.
Igl è fitg putgà che nus n'avain betg pudì far il Scaletta. Cunzunt cun questa bell'aura oz, a mai vegnan bunamain las larmas.
Pervi da la situaziun sin il Pass dal Scaletta cun blera naiv, han ils organisaturs da la sisavla ediziun da la Via Valtellina gì da midar la ruta – e far il viadi motorisà sur il Pass dal Flüela.
Il viadi en survista
- 12.07.24: Claustra e transport a Gargellen (Austria)
- 13.07.24: Gargellen – Schlappinerjoch – Claustra
- 14.07.24: Claustra – Tavau – Dürrboden
- 15.07.24: Dürrboden – Tavau – Flüela – Zernez – Chapella – Zuoz (ruta adattada causa il Pass dal Scaletta che ha memia blera naiv)
- 16.07.24: Zuoz – Samedan – Morteratsch
- 17.07.24: Morteratsch – Pass dal Bernina – Gavaglia – Poschiavo
- 18.07.24: Poschiavo – Brusio – Campocologno – Tirano
- 19.07.24: Return cun tren e camiuns (animals)