Dapi 20 onns èn las localitads da scola a Tschlin senza uffants da scola. Bleras ideas e strategias tge far èn entant vegnidas discutadas. Ma ussa ins ha chattà la gista via, tenor il vicepresident da la vischnanca da Valsot Fadri Riatsch. A Tschlin viva la musica ed il chant, e perquai èsi previs da realisar in center per far musica e chant
Sco emprim in'ustaria
En in plaun da la veglia chasa da scola prevesa la societad «Musica in cumün» da realisar l'ustaria «Bun Tschlin», nua ch'indigens e giasts sa chattan. La sala polivalenta existenta duess daventar il lieu per organisar concerts, e manar tras curs e lavuratoris da tutta sort musica, oravant tut musica populara.
Per pudair realisar il project prefinanziescha la vischnanca da Valsot in import da 350’000 francs, il rest da las localitads vegnan prendidas a fit. La finamira è da realisar pli tard ina fundaziun, quella duess lura cumprar las localitads.
Avess questa part dal project «Musica in cumün» d’avair success, prevesan ils responsabels da realisar or d'ulteriuras localitads da la scola in hotel.
Ils detagls da la visiun
La visiun da la societad è che Tschlin sa sviluppescha tar in vitg da musica, cun diversas activitads en la vischnanca, en spezial en la halla polivalenta ed en l'anteriura chasa da scola. En la halla polivalenta duai dar spazi per exercizis d'uniuns da musica, passa 90 emprovas ad onn. Plinavant eveniments da musica ed eveniments privats. En la chasa da scola duai dar la pussaivladad da star sur notg per gruppas u osps individuals («Chasa Tschlin»), sco era ina ustaria «Bun Tschlin» sco spazi d'inscunter. Ils iniziants e las iniziantas han formulà in plan cun trais etappas.
Emprima etappa (2023/2024)
- Posiziunar Tschlin sco «vitg da musica».
- Introducir l'ustaria «Bun Tschlin» e la «Chasa Tschlin» en la chasa da scola e promover quellas.
- Fundar la societad e bajegiar si l'organisaziun.
L'utilisaziun intermediara da la chasa da scola ha gia cumenzà l'atun/enviern 2022 cun agid da l'agentura «Engadin Booking».
Per l'ustaria «Bun Tschlin» vulan ils iniziants cooperar cun l'organisaziun «Bun Tschlin» quai che pertutga la filosofia sco era ils products duvrads. L'ustaria duai prender a fit las localitads da la societad ed esser in'organisaziun independenta.
La societad ha la finamira da sviluppar projects da musica e programs d'activitad per Tschlin e sur il cunfin da la vischnanca ora. La chasa da scola e la sala polivalenta vegnissan prendidas a fit da la vischnanca. La suprastanza da la societad duai consister d'almain trais persunas.
Etappas duas e trais (2025 – )
- Realisar ina fundaziun.
- Examinar e planisar variantas da svilup per la terza etappa, oravant tut la construcziun d'in nov hotel.
La fundaziun ha la finamira da sviluppar il «vitg da musica» cun las infrastructuras correspundentas. La chasa da scola e la halla polivalenta tutga a la fundaziun. La vischnanca dat quels bajetgs a la fundaziun.
Plan da temp
Avust fin december : Svilup da la strategia e structura, etablir l'uniun cun ils divers ressorts. Plinavant concepir, planisar e realisar l'ustaria «Bun Tschlin».
A partir dal 2024 : Planisar co fundar la fundaziun. Avrir l'ustaria «Bun Tschlin». Sclerir las pussaivladads per sviluppar vinavant. Tranter auter la construcziun d'in nov hotel al lieu da la chasa da scola.
