Dapi trais onns è vegni fabritgà vi da la nova chasa da scola per la vischnanca da Valsot. Uss han ils abitants e las abitantas pudì ir a dar in sguard, sco ch'i guarda ora dadens la scola.
In project da trais onns
Amez Strada – ina da las indesch fracziuns da Valsot – stat la part «veglia» da la scola. Era quest edifizi è vegni renovà en il rom dal project. La nova chasa da scola sa chatta davos la part «veglia». Quest nov bajetg è fabritgà cun laina ed equipà cun differentas stanzas modernas per la scolaziun. Ils dus edifizis èn vegnids colliads cun in tunnel sutterren. Gist daspera è vegni construì ina plazza per sport e giugar. Tut il project ha custà bunamain 5,5 milliuns francs, di Fadri Riatsch, president da la cumissiun da fabrica da la vischnanca Valsot.
Il di da las portas avertas
En las stanzas da scola han ils scolars e las scolaras purschì differentas occurrenzas sco engiavineras, quiz interactivs ed zambregiadas. Suenter la visita en la scola ha la vischnanca Valsot envidà la populaziun da star da cumpagnia. Cun producziuns dals scolars e las scolaras ed in concert dal cor maschadà Valsot è il di da las portas avertas ì a fin.
