Per ses 100avel anniversari vul la Tessanda en Val Müstair bajegiar in nov edifizi cun l'architect da renum mundial Peter Zumthor. La Tessanda citescha Zumthor en ina communicaziun, ch'el vuless gugent bajegiar in edifizi.
L'instituziun vul bajegiar a Valchava e pia bandunar la fracziun St. Maria. En l'edifizi duai dar lavuratoris, deposits ed ina butia. Il cussegl da fundaziun da la Tessanda ha gia approvà il plan e la Tessanda ha acquistà il terren da bajegiar.
![Ort für la Tessada und das neue Gebäude](https://www.rtr.ch/static/cms/images/960w/8b6078.jpg)
Per la manadra Maya Repele èsi cler che la midada a Valchava marchescha ina cesura en l'istorgia. Dapi il 1928 è la Tessanda en la vischnanca, dapi 1958 entamez il vitg en ina gronda chasa veglia. A St. Maria n'haja dentant betg dà il terren da bajegiar adattà.
Per Repele èsi dentant er cler, ch'i saja anc ina lunga via. Ella quintia cun custs da duas cifras da milliuns ch'ins possia dentant finanziar per la gronda part cun la vendita dal vegl edifizi. In concret plan da construcziun na dettia anc betg.