La bell'aura ha era animà Chiara e Fraja dad ir en vacanzas. Las duas chognas da protecziun da muntaneras nursas, hajan, tenor Johannes Fallet, responsabel per las scossas ed il pur da la claustra da Müstair, chattà ina fora en la saiv ed èn svanidas.
Forsa ha il paster gì in problem ed ha dà in sbratg, uschia ch'ils chauns han manegià ch'il paster n’haja forsa betg pli gugent els.
Ina excursiun en Italia
Dal Lai da Rims en Val Müstair, sur la Val da Mora fin en la Valdidentro tranter Livigno e Bormio en l'Italia sajan las duas chognas idas a spass. Là ha ina ciclista vesì ellas ed alarmà ina pensiun d’animals a Sondrio.
Las vacanzas per ils chauns han cumenzà
La pensiun d’animals ha lura tschiffà las fugitivas e purtà ellas a Sondrio. Ils chauns eran chipads, quai vul dir ch'els han purtà cun els in pitschen apparat electronic cun chargià si las infurmaziuns dals chauns. Fin che la pensiun d’animals ha chattà ora danunder che questas chognas derivan, èn passads intgins dis. Pir lura ha Johannes Fallet pudì ir per las duas fugitivas.
La dunna da la pensiun d’animals ha ditg ch'ils chauns sajan stads zunt bravs.
Dapi questa episoda n'han las chognas betg pli chaschunà problems. Ellas n'hajan betg pli duvrà dis libers, uschia Johannes Fallet.