La decisiun è stada fitg stretga: Gabriella Binkert Bechetti ha fatg be ina vusch dapli che necessari per dumagnar il pli absolut da 433 vuschs. Rico Lamprecht ha survegnì 391 vuschs.
Reunir las duas gruppas
La nova presidenta è cuntenta ch'ella è ussa vegnida elegida en quest uffizi. Ch'i dettia ina decisiun stretga saja stà cler per ella. Gia l'ultima giada saja la decisiun stada stretga.
Ina revoluziun totala n'ha Binkert Bechetti betg en senn, ma i dettia pliras sfidas che spetgian ils proxims onns. Ma la finala giaja per guardar che la vischnanca vegnia vinavant e prospereschia.
Rico Lamprecht è dischillus
La decisiun tranter Binkert Bechetti e Rico Lamprecht è davaira stada stretga. L'ultima giada è la batgetta crudada en ils mauns da Lamprecht, questa giada tar Binkert Bechetti.
Jau avess gugent anc ina giada fatg quatter onns sco president communal, ma quai è d'acceptar.
Lamprecht accepta dentant l'elecziun. El è da l'avis ch'el haja fatg buna lavur, ma la val saja probabel restada in zic partida e questa giada haja Binkert gudagnà.
