Sco che Joannes Wetzel raquinta n'haja el betg inventà insatge da nov, mabain gia ils troglodits malegiavan cun pigments da crappa en ils cuvels. El haja be reactivà e sviluppà vinavant ina veglia tecnica e quai cun products indigens. Uschia è naschì il pli nov product dal reservat da biosfera da l’UNESCO Engiadina Val Müstair, la trucca da colurs d’aquarel.
Sfida: chattar la differenta crappa
Joannes Wetzel ha emprais miradur e lavura dapi onns cun pigments da crappa per ses frescos e sgrafits. Ina sfida era da chattar la differenta crappa per las differentas colurs. Sis craps da colur da l’Engiadina e sis da la Val Müstair.
Ina colur na datti dentant betg en sia trucca da colurs, il blau. Blau na datti betg en l’intensitad giavischada en nossa crappa ed el vuleva lavurar be cun crappa indigena e betg guntgir sin in lapislazuli importà. Ins po tuttina malegiar cun sias colurs en blau, tradescha Joannes Wetzel. Cun maschadar duas da sias colurs datti in’illusiun da blau. Tuna misterius ed uschè misterius èsi era en ses lavuratori. Pigments vegnan maschadads cun mel d’avieuls, rascha da bostga da feglia ed ieli da timian. Truccas da lain da schember indigen vegnan emplenidas cun ina squitta cun 12 differentas colurs u sco varianta en in trucca pli pitschna cun be otg colurs.
Passa in onn ha cuzzà il process, da l’idea enfin al product final. In product che va proximamain sin il martgà en differentas butias en l'Engiadina e la Val Müstair.
Or da l'archiv:
