La sonda avant la chatscha duain las preparativas esser prontas. Transportar l’ultima rauba, sco per exempel mangiativas e vestgadira, èn sin il program. Per ina gruppa da chatschaders en la Val d’Uina è quai precis tge ch'els han fatg.
L’aura n’ha dentant betg manegià bain cun ils tschintg chatschaders. In urizi ha fatg in stritg tras il quint. Quel ha chaschunà ina bova da glitta ed ha uschia donnegià la chamona. Per fortuna n’era la gruppa quella saira betg en chamona. I saja in donn total, uschia Flurin Nuotclà, in dals chatschaders.
Anc quella saira han els dentant gì fortuna:
Gia la sonda saira han divers dad autras chamonas en la Val d’Uina contactà nus e ditg ch’els fan en mintga cas lieu e che nus avessan plazza.
Blera mobiglia e mangiativas n'han ils chatschaders dentant betg pudì salvar ord la chamona, be in pèr chaussas ch'i avevan en il segund plaun da la chamona. La rauba impurtanta sco ils schluppets ed ils spievels da champagna hajan els per fortuna gì a chasa, accentuescha Flurin Nuotclà. La chatscha sezza n'è pia betg stada periclitada. Els hajan pudì ir sin la tschertga da buis il prim di.
Nus ans avain schon s’arranschà che nus pudain ir a chatscha ed il material pon ins puspè cumprar u metter ad ir.
Avegnir intschert da la chamona
La chamona sezza è da la vischnanca da Scuol. Ils tschintg chatschaders eran locataris da l’edifizi da lain. Decider tge che capita cun la chasina – sch'ella vegn reconstruida ubain stgarpada giu dal tut – duai la vischnanca decider.
