Per realisar da Scuol anora ensemen cun l’Italia e l’Austria ina nova rait da trajects da viafier, hai dà oz in ulteriur inscunter da represchentants dals dus pajais e dal Grischun. Quel ha gì lieu a Scuol.
Il proxim pass per cuntanscher questa visiun da la mobilitad en las regiuns da cunfin dal Grischun, dal Tirol e dal Tirol dal Sid – è da laschar far studis ch’examineschan la realisabladad da la visiun, sco il chantun ha communitgà. I duai dar examinaziuns geologias ed idrologicas per pussaivels trajects da Scuol a Mals, da Landeck a Scuol, da Landeck a Mals, la via da Garmisch-Partenkirchen a Silz en l’Inntal e per il traject Tirano-Bormio cun cuntinuaziun a Mals.
Vitiers han ils participants da l’inscunter a Scuol decidì da laschar elavurar in studi davart la persistenza e la rentabilitad, cun resguardar aspects socio-ecologics. Quel duai avair en egl tant la fasa da construcziun sco er la fasa da manaschi.
Da nov maina il Grischun la gruppa da lavur tecnica per il project «Terra Raetica». Quella vegn a documentar ils proxims pass e la finala elavurar in rapport che cumbinescha ils resultats dals singuls studis. Sco termin pussaivel per avair il rapport sin maisa vala la fin da l’onn 2023.