Sin bun 19 hectaras cultivescha Elio Paganini a Tirano puma e paira. Bainbaud sa diminuischa ses terren dentant per bun in terz. Bun 6 hectaras terren perda l'um da passa 70 onns. Il stadi exproprietescha il terren per pudair fabritgar in sviament enturn Tirano. Il sviament duai colliar l'uschèumnada Tangenziale, la via sperta tranter il lai da Como e Bormio.
In recurs senza success
Elio Paganini ha fatg recurs encunter l'expropriaziun tar il Tribunal administrativ regiunal, dentant senza success. Ils derschaders han decidì che l'interess public per il project saja da valitar pli aut ch'il donn per privats.
Jau ma stoss arranschar cun questa decisiun. Uss vala da guardar enavant.
Guardar enavant vul actualmain dir per el, da contractar davart l'indemnisaziun. El pretenda almain 4 milliuns francs per il terren ed il donn. Sch'el vegn dentant a survegnir tant saja avert.
Avert saja entant era co'i giaja enavant cun sia cultivaziun. La grondezza bastia bain anc per cultivar fritga a moda economica - a lunga vista stoppia il terren dentant puspè crescher. Quai na saja dentant betg pli en ses mauns, di Paganini.