Nua ch’ins po normalmain far vacanzas patgificas amez l’idilla dal campadi a la riva da l'En a Sur En/Sent è l’emna passada vegnì resgià, taglià e glimà a tut pudair. Numnadamain ha gì lieu il 30avel simposi da sculpturs, organisà da l’uniun Art Engiadina.
Plattafurma per sculpturs
19 artists ed artistas d'otg differents pajais s'han inscuntrads a Sur En. Là han els realisà durant in’emna sculpturas da lain e da marmel. Per ils artists e las artistas è il simposi in’occurrenza d’inscunter, ma per l’in u l’auter er ina plattafurma centrala per la carriera.
Il simposi a Sur En ha mintg’onn var 20 artistas ed artists. La finamira na saja betg da vegnir pli gronds, di Wolfgang Bosshardt, il directur da l'Art Engiadina e manader dal campadi. Era sche l’occurrenza na saja betg da grond’impurtanza economica quai che pertutga il campadi, veglian ils responsabels simplamain promover la cultura e la professiun tradiziunala da sculptur.
Las ovras realisadas vegnan exponidas durant dus onns sin la senda da sculpturas sur il campadi Sur En.