Pli baud vegnivan las plazzas nizzegiadas sco lieus d’inscunter, amis e vischins sesevan sin il banc davant la porta da chasa u enturn il bigl amez la plazza per discurrer in cun l’auter e quintar novitads.
Ma quella activitad sociala è ida en emblidanza, uschia il president da la societad Creacumün, Riet Fanzun da Tarasp. Cun differentas intervenziuns vulan els puspè activar quels inscunters, oravant tut la giuventetgna duess vegnir activada.
A Ftan han lieu durant las proximas emnas differentas occurrenzas sin la plazza publica. Els han fabritgà in palc cun sutgas enturn il bigl, plinavant er ina sutga da ballabaina. Là han lieu concerts e chant, in pitschen teater, occurrenzas cun uffants ed er activitads cun giuvenils. La devisa è «la plazza è Voss palc».
La finamira è da reviver la plazza e da stgaffir in lieu d’inscunter. Tenor ils responsabels da la societad Creacumün saja il basegn avant maun. I fetschia be da basegn da puspè far attent sin quell'attracziun.
